Փոխըմբռնման հուշագրի ստորագրում ՀՀ սփյուռքի գործերի գլխավոր հանձնակատարի գրասենյակի հետ

Իզմիրլյան հիմնադրամը և ՀՀ սփյուռքի գործերի գլխավոր հանձնակատարի գրասենյակը ստորագրել են փոխըմբռնման հուշագիր։ Հուշագիրը ստորագրել են Սփյուռքի գործերի գլխավոր հանձնակատար Զարեհ Սինանյանը և Իզմիրլյան հիմնադրամի երկրի տնօրեն Արմեն Չոբանյանը։

Գլխավոր հանձնակատար Զարեհ Սինանյանը բարձր գնահատեց տարիների ընթացքում Իզմիրլյան հիմնադրամի հետ ձևավորված արդյունավետ և հայանպաստ համագործակցությունը։

«Հիմնադրամը հսկայական գործունեություն է ծավալում Հայաստանում՝ նպաստելով հայրենիքի մի շարք ոլորտների զարգացմանը։ Առանձնացնեմ հիմնադրամի հետ մեր համագործակցությունը հայրենադարձներին աջակցելու ուղղությամբ, մասնավորապես՝ Գրասենյակի և առողջապահության նախարարության հետ համատեղ իրականացվող՝ հակամարտության գոտիներից ժամանած հայրենադարձների առողջապահական աջակցության ծրագիրը։ Հիմնադրամը նաև մեր Գրասենյակի Հայրենադարձության և ինտեգրման կենտրոնի վստահելի գործընկերն է և այժմ աջակցում է կենտրոնի տեխնիկական հագեցմանը»,— նշեց Զարեհ Սինանյանը։

Իզմիրլյան հիմնադրամի հայաստանյան գրասենյակի տնօրեն Արմեն Չոբանյանը պատրաստակամություն հայտնեց հետագայում ամրապնդելու և ընդլայնելու գործընկերությունը Սփյուռքի գործերի գլխավոր հանձնակատարի գրասենյակի հետ։